قصيدة بعنوان ( بايع الهم )
بقلم : إبراهيم محمد رمضان
يابايع الهم
بكم تبيع الهَم للمساكين
عايشين حياتنا بِنعاني
وعلى البلاء صابرين
يوم بنجوع ويوم بنشبَع
يوم بنِدفَع
ويوم نشتِري بالدين
ولما نِمرض بنُصبر
والأجرْ ع المولى
نرفع إيدينا للإله داعيين
يارب إشملنا بعفوَك وغفرانك
إشفي مريضنا عبدك المسكين
يابايع الهم
خلاص من همَكّْ إستكفينا
كفاية علينا سيبنا
وروح لناس تانيين
إن كانوا يصبروا زيّنا
يقبَلوا...
أو يقولوا مش عاوزين
جاي تبيع الهَم والهَم هناعايش
عايش معانا ومعشش
نافش الريش هايش
كأنه راجل مجنون
أو ولد صغير طايش
وفي الآخر قبلنا بالهَم
سِكِتنا وقلنا آمين
يا بايع الهم
خُد همك عنِنا واِرحَل
تِعِبنا وكان نفسِنا
تبعِد عنِنا وتِخجَلْ
رضينا بالهَم والهَم
مارضِيش بينا
عمَل فينا إللي عمَل
وفاكِرنا بكده نسينا
لكنَكْ يابايع الهَم
همَك تبيع همَك
إن كُنت ترضى تبيعُه
لأبوك أو أُمك
خلاص بنشتِريه مِنك
ونكونْ بكده راضيين
يابايع الهم
إيه تاني بتبيعُه غير الهَم
جرّب تبيع شئ تاني
علشان ما ييجي يوم تِندَمْ
إحذر يجيلك يوم
من اِلهَم ماتسلَم
لأن إللي بتعملوا في الناس
عند ربّك مابيروح
إسمع كلام اللي إنكوى
بِهَمك المفضوح
روح ياعمّي روح
كفّر عن ذنوبك
بلاش تقول
فُلان محسوبي
وفُلان محسوبك
وانوي فعلْ الخير
يمكن شئ منه ينوبك
وقول لكل إللي كويتهُم
بنعتَّذر ليكم آسفين
يابايع الهم
حتى في بيع الهم
فيه كمان محاسيب
إللي مابتِعرفوش تظلِمه
وإللي بتعرفه بتسيب
ولو قُلت لك إختِشي
تقول لي ده مش عيب
فُلان دَه أنا ما أعرفوش
لكِن فُلان دا حبيب
بكره ييجي لَكْ يوم
إللي عملتُه منُه تدوق
وأعزّ العزيز عندك
هيبات قلبك عليه محروق
ماهو يابايع الهم
عنك ....
ملائِكةِ الحقِ مش نايمين
يابايع الهم
خُد همك عننا واِرحل
وإعطينا بِدالُه سعادَه
وأيام جميلة تفرِحنا
خلاص تعِبنا وقاسينا
وما طابت كِده جروحنا
كِفاية بقى علينا
وواجبك تريّحنا
وتِرحل عنِنا في الحال
واترُكنا نجرّبْ الهنا
والنوم وراحةِ البال
إللي إنحرمْ مِنها
كُل الغلابة والمساكين
يا بايع الهم
ليست هناك تعليقات:
إرسال تعليق