دير ال فمك لجامو!
( زجل مغربي)
يا لي سارح بلكلام فالناس
سد فمك ودير ليه لجامو
بين الجماعة يجيب ليك التعاب
راه قيمة الراجل فسكاتو
مول لعقل الرزين افهم لكلام
والعبيط وياك تعاشرو
دير الخير وتفادى لحرام
ولا تعادي قريب وتنافقو
تعود فاعمالك تكون مخيار
المجمج كيصوط من جنابو
لا ثقة تديرها فذاك المشرار
يكوي ويبخ ديما بنفاقو
مول النية عايش فلعذاب
من شر الغارس نيابو
العَوْدْ لمليح يحنحن فلفراح
والدحش يقهرك بغواتو
فالزواج تيقن من النساب
شحال تالورود دبالو
السبع ديما فالغابة كيبان
والضبع يسدعك بلغيطو
توكل فالطريق وبلا تخمام
مراد الله راك تصيبو
-بقلم: محمد دومو
-مراكش/ المغرب
ليست هناك تعليقات:
إرسال تعليق