بقلمي المتواضع أيقونة الأطلس
زهور الزجالة أسماء حميد عمور
زجلية عن الأم بمناسبة اليوم العالمي للمرأة من المغرب الشقيق إلى بلدكم العراق الحبيب
💌 الحنة والجنة تحت اقدامك يا مي 💌
مي يا مي الحنينة شحال هزيتي وشحال تعبتي
مي الحنينة شحال شقيتي وعييتي وفيا بقيتي
بنتك انا يا مي نغطيك بالورد والزهر والحنا
منشبعش من حبك يا مي يا لي فيك شلا محنة
خيرك يا مي صعيب نردو صعيب ندوزك
أنا فخيرك غرقانة فرحانة عمرني نفوتك
عشت معاك يام زينة يا مي لهلا يحرمني من حنانك
أنتي النور فظلامي انت غاية باهية فيامك
الجنة و الحنة تحت أقدامك بيديا يامي درتها ليك ونا فخورة
بيك تحلا الگعدة بيك يحلا المجمع نرش الزهر ونطلق البخور المغمورة
يا ربي متحرمنيش من مي وا العالي يا مي راني خايفة
تلا بيا ليام ويضربوني الحيوط بنيتك تولي تالفة
يا لي عندو ميمتو يتهلا فيها ويزيد يتهلا بلا قياس
راكم تضويو بدعاها وتزيدوا يا ولاد الناس
راه الرابح من الوالدين والخاسر من الوالدين سمع يا الحنين
راني بنيتك يا مي بيك شديت رزقي بهاد ليدين
نطلبوا الله يرحم كل ميمة ماتت ولي بقات راها فعينيك
من الفرحة والبهجة والسرور لا تنساها راها هي لي دائمة ليك
ليست هناك تعليقات:
إرسال تعليق