البندول
تلات ساعات
واكون ف طيارة خمسة
ا،لّا خمسة
الا،جتماع طوَّل
على قد مانتي قريبة من ساعتي
على قد مانتي بعيدة عن وقتي
و ف وقتِك المقتول
انا ف اجتماع مشغول
و تلملمي ف حاجتي
بتلمي ضحك الصبايا
متخبيين فى الزوايا
و ببصتين فى المراية
بتشوفي تعَبِك معايا
لا صغرتي ولا شِختي
الاجتماع طوَّل
نبدأ من الأول
من أول التخطيط
لابس عباية عبيط
لابس جلابية
لكنّه كان فيكي
أجمل أمانيكي
و المسألة فيا
لاهي بين شماغ وعقال
ولا دقة الموّال
يوماً سِكت صِحتي
ما تشوف بقى راحتي
متجمعة ف راحتي
الفكرة منفية
كيلتين هموم و اّمال
لهفة صبي تنشال
و ف كلمتين تنقال
حبة ملاغية
على ربع حِنية
مفتاح يفُك السِحر
عن عينِك النايمة
قابض عليه الغُول
نايم ف بير بترول
لحظة زمن غايمة
و كان مالي
أعَمَّر رُبعكوا الخالي
و كان مالي
بشر تايهين
يعمَّروا الصحرا
ويسألوا السحرا
مفتاح يُفُك السحر
يفتح زرار ساعتي
ويرُدني لوقتي
واللحظة مش هي
ولا الميزان معدول
و مهما جَف القول
للساعة ميت بندول
و الحق ميت كَفّة
وانا ساعتي مش عارفة
غير الامتثال للوقت
غير الامتثال للقول
و ف لحظة منسيّة
ساعة زمن تنفك
قلبي ملاه الشَك
ليه ع القلم باتَّك
راح ينكسر سنُّه
بقى قد أيه سنُّه
و الشِعر ده مِنُّه
لكن نسي أنُّه
شاعر و مُتَنبي
وأمتى هايخبي
شِعرُه ف كرّاسُه
حتى الزمن داسُه
و ف نِبلُه واقواسه
تاه الهدف منُّه
واتبدِّلِت ساحتي
الاجتماع هايطول
بَدَن الكلام مشلول
بيلاغي ف المسئول
زِهقِت حروف القول
وانا ف المَلل رحَرَحت
لانا جاي بيه ولا رُحت
و مَسحت نضارتي
بَصيت على ساعتي
كان الزمن بندول
بيجِس نبض القول
و يحُط سماعتُه
وبيفصِل المحلول
يكتب ف كرّاستُه
عُذر الغياب مقبول
لمّا انتهى وقتُه .
من ديوان ثورة الفحم
شعر ..
حسام بخيت
